Etiqueta Negra 2025 en Pontevedra

Etiqueta Negra 2025 reunirá en novembro un cento de expositores e presentará vinte novidades gourmet no Recinto Feiral de Pontevedra

A feira do gourmet galego celebra a súa novena edición

A novena edición de Etiqueta Negra, a feira do gourmet galego, celebrarase os días 8, 9 e 10 de novembro no Recinto Feiral de Pontevedra, consolidándose como o grande escaparate do produto galego de alta gama.

O encontro reunirá un cento de expositores, dos que dezaseis participarán por primeira vez, e presentará máis de vinte novidades que reflicten o dinamismo e a capacidade innovadora dun sector en expansión.

Compromiso coa calidade e coa orixe

A edil de Promoción Económica, Anabel Gulías, destacou o compromiso do evento coa calidade e a orixe, subliñando que é a única destas características na rexión.
Declarou:

“Este ano queremos facer fincapé na verdadeira natureza desta feira ou deste encontro. Estamos comprometidas e responsábeis co noso, queremos seguir mantendo ese listón ben alto e manter viva a orixe e a esencia da feira”.

Gulías engadiu que é “a única feira de Galiza na que se traballa con produtos de primeira calidade”. A razón principal de conservar esta orixe é poñer en valor “a absoluta calidade dos produtos do sector primario no noso país, pero tamén os procesos de innovación sobre os alimentos”.

Participación e representación territorial

A menos dun mes do inicio, a feira ten case ocupado o 100% da súa superficie, unha mostra evidente da forte vinculación do sector con este encontro profesional que medra edición tras edición.
A distribución dos expositores será a seguinte:

• 28% proceden da provincia da Coruña
• 35% da de Pontevedra
• 22% da de Ourense
• 15% da de Lugo

Un equilibrio que reflicte a presenza de todo o territorio galego neste evento.

Novas incorporacións e empresas participantes

As 16 novas empresas participantes son:

Cacahuetes artesáns, Conservas Artesanas Gallegas, Mamá Teresa (doces artesanais), Morriñas de Castaña(galletas de castaña), Oxóco (chocolates artesáns con sabor galego), Lácteos Bretón, Queixería Daniberto, Toulo(elaboración cárnica), Néboa na ría (obxectos de madeira para restauración e gastronomía), Viña Carpazal, Paco&Lola, El Nogal, Casa Merche (froitos secos e apicultura), Tupana Obrador (panadaría galega), Avigal (polos criados en liberdade), Ke Tequeños (tequeños artesáns gourmet) e Conservas Lago Paganini (conservas artesanais galegas).

Tamén participarán:

• A Tetería da Deputación de Pontevedra, co seu espazo dedicado á marca TéAreeiro.
• Agacal (Axencia Galega de Calidade Alimentaria).
• A Consellería do Mar, que se incorpora por primeira vez con espazo propio xunto a produtores como Algas La Patrona, Conservas Artesanas Gallegas, Contrabando da Ría, Lago Paganini, Mareterra e Pepa a Loba, reforzando así a presenza dos produtos mariños galegos.

“Compartindo o noso”: lema e espírito da edición 2025

Baixo o lema “Compartindo o noso”, Etiqueta Negra 2025 convida a descubrir a riqueza gastronómica galega, onde tradición, innovación e calidade se dan a man.

Novidades destacadas 2025

Viños e espumosos

• Adega Buezas presentará un espumoso fresco e diferenciador.
• Pura Vila mostrará o seu tostado natural, perfecto para maridar con doces artesanais.
• Paco&Lola lanzará o innovador iWine nº 0, unha proposta vangardista e disruptiva.

Doces e sobremesas

• Doziños lanzará un novo caramelo.
• Oxóco levará turróns e bombóns elaborados artesanalmente.
• Martietas de Fío presentará sabores de limón e vainilla.
• Morriñas da Castaña ofrecerá novas creacións inspiradas na castaña galega.
• Quinteiro Doce achegará unha colección festiva de doces de Nadal.
• El Nogal amosará unha améndoa marcona con toque de limón e canela.
• Cacahuetes artesáns presentará un pistacho tostado con leña, unha versión distinta deste clásico aperitivo.

Cárnicos e embutidos

• Cienporcel mostrará a súa txistorra de porco celta, salchicha fresca e paté de trufa.
• Casa da Avoa sorprenderá cun chourizo con viño Albariño pensado para Nadal.
• Toulo presentará embutidos tradicionais reinterpretados con toque innovador.
• Jamones González ampliará a súa gama con raxo e taquiños de lacón en formatos versátiles.
• Avigal dará a coñecer o polo Pío Campero, símbolo de tradición e sabor auténtico.

Conservas e produtos innovadores

• Conservas Artesanas Gallegas presentará mexillón en aceite de oliva, allo e chile.
• Calabizo amosará o seu untable vexetal de pemento de piquillo.
• Trasdeza Natur levará láminas de froitas como snack saudable.
• Ke Tequeños ofrecerá a súa versión galega deste clásico venezolano.
• Lorri incorporará un pan raiado funcional con novos sabores.

Estas propostas súmanse ás múltiples referencias consolidadas que estarán presentes: viños, licores, cervexas, marmeladas, mel, galletas, tortas, doces, xeados, aceites, queixos, patés, caracois, carnes, embutidos, conservas, setas, legumes, algas, salsas, aderezos e moitas máis delicias escollidas pola súa singularidade e calidade excepcional.

Actividades e programación

A Zona de Catas ofrecerá unha programación continua con degustacións e presentacións das novidades, ademais de catas comentadas e demostracións de cociña en directo.
No total, haberá un cento de actividades paralelas.
O programa completo será presentado nos próximos días.

Patrocinadores e colaboracións

Etiqueta Negra é a única feira en Galicia dedicada exclusivamente aos produtos de alta gama galegos e serve como punto de encontro entre produtores, distribuidores, restauradores e consumidores.

Conta co patrocinio principal do Concello de Pontevedra e o apoio de:

• Estrella Galicia e Cabreiroá (auga oficial)
• Consellería do Mar
• Axencia Galega da Calidade Alimentaria
• Deputación de Pontevedra
• Froiz e Gadis

Tamén colaboran o CIFP Carlos Oroza, Gráficas Anduriña, Efímera Espacios Temporales e Labauh Factory.

Información práctica

🗓 Datas: 8, 9 e 10 de novembro
📍 Lugar: Recinto Feiral de Pontevedra
🕒 Horarios:

• Sábado e domingo: de 11:00 a 21:00 h
• Luns: de 11:00 a 19:00 h

🎟 Entradas:

• 3 € por día
• 5 € polo abono das tres xornadas

🍴 O recinto contará cunha zona gastronómica e foodtrucks para completar a experiencia do público visitante.